Baptist Mission School Ngengpuitlang Pian Chhuah Dan

LALHRIATPUIA CHHANGTE
HEADMASTER,
BMS NGENGPUITLANG.

Sikul Logo

 

Ngengpuitlangah hian Baptist Kohhran hi Ni 4 October 2009 ah alo ding tan a. Tichuan hetia kohhran alo din takah chuan zirna in te hi BCM Head quarters-ah te dil ve ila kan khawtlang pawhin hma kan sawnpui ang tih rilru puin Local churh committee chuan alo rel a. Ngengpuitlang hi Bungtlang ‘S’ Pastor bial chhunga awm anih avangin, chu chu bial committee-ah thlen leh a ni a. Bial Committee chuan pawmpuiin BCM Mission department-ah a thlen leha anni’n ngun taka ngaihtuahin sikul hi pek an lo remti ta a. Hetia sikul a din theihna atana ngaihtuahna sengtu mimal tam tak an awm a, an hming tarlang vek rihlo mai ila. He School a din theih nana sulsutu pawimawh tak mai Rev. C. Vanlalhruaia Bungtlang ‘S’ Bialtu Pastor erawh sawi lan loh phal chi a ni lovang.

A HMUN HMA
Sikul a din dawn chuan a hmasaberin a hmun a ngai pawt a. Pathianin mite thinlungah hna a thawka Pu Lalchhungliana S/o. Upa H. Alzama-te chhung chuan a thlawnin sikul hmun tur hi min pe hlauh mai a anmahni avangin hmun nuam tak leh thengthaw takah sikul kan nei thei taa ni.

SIKUL LEH QUARTERS SAK THU
School sak hna hi bialtu pastor kutah headquarters lamin an dah vek avangin pastorin ruahmanna a siama, Bungtlang ‘S’ kohhran hrang hrangte’n School leh Quarters pahnihte hi an rawn sa a. Khawtlang in min phurpui a, LWA in school chhuat zutnaah hnatlangin minpui bawk a. Tichuan Quarters chhung bungraw siam turin BCM Moria Rahsi veng, Lungleiin workcamp an rawn nei bawk a, tiang chuan he school hi dinchhuah alo ni ta a ni.

SIKUL TAN CHHOH DAN
He sikula thawk tur hian BCM Mission dept chuan mi pathum min ruata chung te chu- Lalhriatpuia Chhangte, David Laltanpuia Chongthu leh Lalramchhani te kan ni a. Dt 25.1.12 ah Ngengpuitlang hi kan thleng ve chiah a ni. Tichuan theih ang angin sikul hi tan chhoh ve nise kan ti a kan tan hmain a hawnna te kan nei ve a. Rev. H.Lianngaia General Secretary Baptist Church of Mizoram-in Dt. 13. 2.12 khan a hawnna a neia chuta tang chuan sikul kal tan ve nghal a ni a. Sikul hian motto te nei ve ila kan ti a kan motto atan chuan 'GOD FIRST' tih kan hmang ve ta a ni. Tun dinhmunah hian kan naupang zawng zawng enrollment hi 49 kan nia  Cl-I, Cl-II, Cl-III leh Cl-IV ah te then an ni. Tunah hian kan thawhpui David Laltanpuia chu Madhya Pradesh lamah min sawn sak avangin a aiah Nl Lalthanpuii a rawn awm a, ti chuan mi pathumin he zirtirna hna hi kan thawk ve ta a ni.

(Thu belh: The Shadow in kan sikul chanchin ziak tura min sawm hi ka lawma, amaherawh chu hun ka neih loh em avangin chip chiar takin ka ziak thei ta lo a pawi ka ti takzet a. Ziah lan ngei tur ziah tak loh te ka nei ang tih ka ring, chhiartu ten min hrethiam hram dawn nia. The Shadow mite tan chawlhna tlak hlim nuam leh belh tlak ni mawlh rawh se . Ka lawm e.)

Sikul naupangte 2012